ⵉⵙⵏⵎⴰⵍⴰ ‎ⴰⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⵙ ⵓⵙⴱⴷⴷⵉ ⵏⵏⵙ‎, ⴰⵙⵙ ⵏ ⵓⵙⵉⵎⵡⴰⵙ 23 ⵛⵓⵜⴰⵏⴱⵉⵔ 2025, ⵜⴰⵙⵎⵓⵏⵉ ⵜⵉⵙⵙ 23 ⵏ ⵓⵙⵇⵇⵉⵎ ⵏⵏⵙ, ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵜⴰⵙⵓⵍⴰⵏⵜ ⵉⵡⵜⵜⵙⵏ ⴰⵙⴷⵓⵙ ⵏ ⵜⵓⵚⴽⴰ ⵏ ⵜⵎⵔⵙⴰⵍⵜ ⵜⴰⵏⴰⵎⵓⵔⵜ ⴳ ⵉⴳⵔ ⵏ ⵓⵙⴼⴰⵍⴽⵉ ⵏ ⵜⵓⴷⵔⵜ ⵜⴰⴳⴷⵓⴷⴰⵏⵜ, ⴷ ⵓⵙⵙⴷⵓⵙ ⵏ ⵡⴰⴷⴷⴰⴷ ⵏ ⵜⵙⵏⵓⵔⴰⵢⵜ ⴰⵎⵎ ⴰⵎⵙⴽⴰⵔ ⴰⵎⵙⴷⴷⵓⵔ ⴳ ⵓⵃⵟⵟⵓ ⵏ ⵡⴰⵜⵉⴳⵏ ⵏ ⵜⵣⴷⴳⵉ, ⴷ ⵓⵙⵔⵙ ⵏ ⵜⵎⵢⴰⵎⴰⵏⵜⵜ ⴳ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ.

ⵉⵙⵎⵓⵏ ⵓⵖⴰⵡⴰⵙ ⵏ ⵜⵙⵎⵓⵏⵉ ⵉⴳⵊⴷⴰⵏ ⵉⵙⵜⵔⴰⵜⵉⵊⵉⵢⵢⵏ ⵏⵏⴰ ⵉⵙⵏⵎⴰⵍⵏ ⵜⵓⴳⵜ ⵏ ⵜⵏⴰⴼⵓⵜⵉⵏ ⵏ ⵜⴼⵔⴽⵜ ⴷ ⵓⵥⵍⴰⵢ ⵏ ⵡⴰⵜⵉⴳⵏ ⵏⵏⵙ, ⵖⵉⴽⵍⵍⵉ ⵉⴼⴽⴰ ⵓⵙⵇⵇⵉⵎ ⵏ ⵓⴳⵔⴰⵡ ⵜⴰⵡⵉⵜ ⵏⵏⵙ ⵉ :

- ⴰⵙⵖⵣⵏ ⵏ ⵓⵙⵏⵜⵉ ⵏ ⵓⵖⴰⵡⴰⵙ ⵏ ⵓⵥⵕⴼ ⵏ ⵓⵙⴳⴳⵯⴰⵙ ⵏ 2026 ⵏⵏⴰ ⵉⵙⵏⵎⴰⵍⵏ ⵜⵉⵔⴰⵜ ⵏ ⵓⵙⴱⵓⵖⵍⵓ ⵏ ⵉⴳⵔ ⵏ ⵜⵡⵓⵔⵉ ⵏⵏⵙ ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵜⵡⵓⵔⵉ ⵏⵏⵙ.

- ⴰⵎⴹⴰⴽⴰⵕ ⵅⴼ ⵜⴷⵔⴰⵡⵜ ⵏ ⵓⴳⵔⴰⵡ ⴳ ⵉⵙⵜⴰⵢⵏ ⴰⴷ ⵢⵓⵛⴽⴰⵏ, ⴳ ⵓⵙⴰⵜⵉ ⵏ ⵜⵎⵥⵍⵉⵢⵉⵏ ⵏⵏⵙ ⵜⵉⴷⵓⵙⵜⵓⵔⵉⵏ ⴳ ⵓⵙⴼⴰⵍⴽⵉ ⵏ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵓⵃⵟⵟⵓ ⵏ ⵜⵣⴷⴳⵉ ⵏ ⵜⵎⴳⴳⵉⵜⵉⵏ ⵏ ⵉⵙⵜⴰⵢⵏ.

- ⴰⵙⵖⵣⵏ ⵏ ⵓⴷⵍⵉⵙ ⴰⴷⵍⵙⴰⵏ ⴰⵎⵓⵍⵉ ⵅⴼ ⵓⵙⵏⵜⵍ ⵏ ⵓⵙⴳⵓⴼⵙⵓ, ⵉⵔⴰⵏ ⴰⴷ ⵜⴳ ⵜⴷⵍⵙⴰ ⴷ ⵓⵙⵏⴼⵍⵓⵍ ⵢⴰⵏ ⵡⴰⵍⴰⵍ ⵏ ⵓⵙⵙⴼⵔⴽ ⵏ ⵡⴰⵎⵓⵏ ⴷ ⵢⴰⵏ ⵡⴰⵏⵙⴰ ⵏ ⵓⵙⴱⵓⵖⵍⵓ ⵏ ⵓⴼⵔⴰⴽ ⴰⵎⵓⵍⵉ.

- ⴰⵙⵎⵓⵜⵜⴳ ⵏ ⵜⴷⵔⴰⵡⵜ ⵏ ⵓⴳⵔⴰⵡ ⴳ ⵓⵏⵎⵓⵇⵇⴰⵔ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵢⵎⵓⵏⵏ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ (ⴷⵓⵊⴰⵏⴱⵉⵔ 2025 ⴳ ⵇⴰⵟⴰⵕ), ⴰⵎⵎ ⵢⴰⵏ ⵓⴷⵖⴰⵔ ⴰⴷⵙⵍⴰⵏ ⵏ ⵓⵙⴷⴷⵉⴷ ⵏ ⵜⴷⵔⴰⵡⵜ ⵏ ⵍⵎⵖⵔⵉⴱ ⴳ ⵓⵏⵎⵓⵇⵇⴰⵔ ⴰⵎⴰⴹⵍⴰⵏ ⴷ ⵓⵙⴼⵙⵔ ⵏ ⵉⵔⵉⵎ ⵏⵏⵙ ⴰⵏⴰⵎⵓⵔ.

- ⴰⵙⵎⵏⵉⴷ ⵏ ⵓⵏⵇⵇⵉⵙ ⵅⴼ ⵓⵙⵏⵜⵉ ⵏ ⵜⵙⵏⴱⴹⴰⵢⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵅⴼ ⵓⵎⵙⴰⵙⴰ ⵏ ⵜⵎⵓⵏⵜ ⵜⵉⴼⵔⵉⵇⵉⵢⵜ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⵙ ⵎⴰⴷ ⵉⴳⴰⵏ ⵢⴰⵏ ⵓⴳⵣⵣⵓⵎ ⴳ ⵏ ⵉⵙⵓⵖⴰⵏ ⵉⵎⴰⴹⵍⴰⵏⵏ ⵏⵏⵙ ⴳ ⵉⴳⵔ ⵏ ⵜⵣⴷⴳⵉ.

- ⴰⵙⵖⵣⵏ ⵏ ⵜⵡⵉⵍⴰ ⵜⴰⵎⴳⴳⴰⵔⵓⵜ ⵏ ⵜⵎⴰⴳⵉⵜ ⵏ ⵉⵥⵕⵉ ⵜⴰⵎⴰⵢⵏⵓⵜ ⵏ ⵓⴳⵔⴰⵡ ⵏⵏⴰ ⵉⵙⵏⵎⴰⵍⴰⵏ ⵜⴰⵎⴰⴳⵉⵜ ⵏ ⵜⵎⵔⵙⵍⵜ ⴷ ⵜⴱⵔⴰⵜ ⵏ ⵓⵎⵓⵏ ⵏⵏⵙ.

- ⴰⴹⴼⴼⵓⵕ ⵏ ⵜⵡⵓⵔⵉⵡⵉⵏ ⵏ ⵡⴰⵎⵎⴰⵙ ⵏ ⵓⵎⵢⴰⵡⴰⴹ ⵉⵥⵍⵉⵏ ⵙ ⵓⴳⵔⴰⵡ, ⴰⵎⵎ ⵢⴰⵏ ⵓⵙⵙⴰⵔⵓ ⵏ ⵓⵙⵓⴷⵙ ⵏ ⵜⵏⴰⴼⵓⵜⵉⵏ ⵏⵏⵙ ⴳ ⵉⵏⵎⵓⵔⴰ ⴷ ⵓⵙⵀⵡⵏ ⵏ ⵓⵛⴽⵎ ⴼ ⵉⵎⵥⵕⵉⵜⵏ ⵏ ⵓⵙⴳⵓⴼⵙⵓ.

- ⴰⵙⴳⵎⴹ ⵏ ⵉⵙⴰⵜⵉⵏ ⵏ ⵜⵎⵢⴰⵇⵇⴰⵏⵉⵏ ⵏ ⵓⵎⵢⴰⵡⴰⵙ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ, ⴳ ⵓⵙⴷⴷⵉⴷ ⵏ ⵓⴱⵔⵉⴷ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴳ ⵓⵎⵏⴰⵍⴰ ⵏ ⵉⵏⴰⵥⴰⵕⵏ ⵏⵏⵉⴳ ⵏ ⵜⵎⵏⵥⴰⵡⵉⵏ.

- ⴰⵙⵎⵏⵉⴷ ⵏ ⵜⵎⴰⵢⵏⵓⵜⵉⵏ ⵉⵥⵍⵉⵏ ⵙ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵉⵏ ⵜⵉⵙⴳⴰⵡⴰⵏⵉⵏ ⵏ ⵓⵙⵇⵇⵉⵎ ⴷ ⵓⵙⵎⵏⵉⴷ ⵏ ⵉⵏⵖⵎⵉⵙⵏ ⵅⴼ ⵉⵎⵓⵙⵙⵓⵜⵏ ⵏ ⵓⴳⵔⴰⵡ, ⵙ ⵓⵃⵕⵛ ⵏ ⵓⵎⵏⵣⴰⵢ ⵏ ⵜⵣⴷⴳⵉ ⴷ ⵓⵙⵡⵓⴷⴷⵓ ⴰⵎⴷⵔⴰⵡ.

ⵜⵙⵎⵓⵏⵉ ⴰⴷ ⵢⵓⵛⴽⴰⴷ ⴳ ⵜⵉⵣⵉ ⵜⴰⵙⵔⵜⴰⵏⵜ ⴷ ⵜⵎⵔⵙⴰⵍⵜ, ⵍⵍⵉⵖ ⵉⵣⵓⵍ ⵓⴳⵔⴰⵡ ⴰⵏⴰⵎⵓⵔ ⴰⴷ ⵜⴽⵛⵎ ⴳ ⵓⴱⵔⵉⴷ ⵏ ⵓⵙⴽⵓ ⵏ ⵓⵏⴳⵔⴰⵡ ⵏ ⵜⵣⴷⴳⵉ, ⵙ ⵓⵙⵎⵓⵏ ⵏ ⵓⵙⴳⴳⴷ ⴰⵎⴰⵔⵙⴰⵍ ⵙ ⵓⵎⵏⵉⴷ ⴰⵏⴰⵎⵓⵏ ⴷ ⵓⴷⵙⵍ, ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵍⵎⵖⵔⵉⴱ ⴳ ⵓⵎⴰⴹⴰⵍ ⴳ ⵓⵎⵏⵣⴰⵖ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⵎⴰ ⵢⴰⴷ ⵉⵎⵙⴰⵙⴰⵏ ⴷ ⵉⵎⴰⴼⵍⵍⴰⵜⵏ ⵉⴳⵔⴰⵖⵍⴰⵏⵏ ⵏ ⵜⴳⵍⴷⵉⵜ ⴷ ⵡⴰⵇⵇⵍⵏ ⵏ ⵉⵏⴰⵎⵓⵔⵏ. ⵏⵙⵙⴽⵜⵉ ⵎⴰⵙ ⴷⴰⵔ ⴰⵙⵇⵇⵉⵎ ⵏ ⵓⴳⵔⴰⵡ, ⵉⵍⵍⴰ ⴳⵉⵙ ⵓⴳⴳⴰⵔ ⵏ ⵓⵏⵙⵙⵉⵅⴼ ⵏⵏⵙ, 12 ⵏ ⵉⴳⵎⴰⵎⵏ, ⴷⴰ ⵜⵜⵓⵙⵜⴰⵢⵏ ⵙⴳ ⵡⵉⵏⵏⴰ ⵖⵓⵔⵙⵏ ⵜⵉⵔⵎⵜ ⴷ ⵜⵣⵎⵎⴰⵔ ⴳ ⵉⴳⵔ ⵏ ⵓⴳⵔⴰⵡ, ⴷ ⵉⵜⵜⵓⵙⵙⴰⵏⵏ ⵙ ⵜⵣⴷⴳⵉ ⴷ ⵜⵖⵓⴷⴰ, ⴰⵙⵇⵇⵉⵎ ⴷⴰ ⵉⵜⵜⴳⴳ ⵓⴳⴳⴰⵔ ⵏ ⵜⵣⵎⵎⴰⵔ ⵏⵏⴰ ⴷ ⵢⴰⴽⴽⴰ ⵓⵙⵍⴳⵏ ⵅⴼ ⵓⵣⵣⵔⴰⵢ ⴷ ⵓⵙⵖⵣⵏ ⵏ ⵜⵏⵜⴰⵎⵉⵏ ⴷ ⵉⵖⴰⵡⴰⵙⵏ ⴷ ⵉⵙⵏⵜⴰⵢ ⴷ ⵜⵣⵔⴰⵡⵉⵏ ⴷ ⵉⵏⵇⵇⵉⵙⵏ ⵏⵏⴰ ⴷ ⵢⴰⴽⴽⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⴰ ⵉⵙⴽⵔ ⵓⵙⵇⵇⵉⵎ, ⴷ ⵓⵙⵖⵣⵏ ⵏⵏⵙⵏⵜ.