ⵜⵙⵏⵓⴱⴳ ⵜⵎⴷⵉⵏⵜ ⵏ ⵕⵕⴱⴰⵟ ⴳ ⵡⵙⵙⴰⵏ ⵏ 28 ⴷ 29 ⴽⵟⵓⴱⵕ 2025 ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵏⵎⵏⴰⴹ ⵅⴼ ⵜⵣⴷⴳⵉ ⵜⴰⴳⴷⵓⴷⴰⵏⵜ, ⵍⵍⵉ ⵢⵜⵜⵓⵙⵏⵎⴰⵍⴰⵏ ⵙ ⵜⵎⴷⵔⴰⵡⵜ ⴳⵔ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴷ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ (OCDE), ⵙ ⵜⴷⵔⴰⵡⵜ ⵏ ⵉⵎⵙⵜⴳⴳⴰⵔⵏ ⴷ ⵉⴳⵔⴰⵖⵍⴰⵏⵏ ⵉⵙⵎⴷⵢⴰⵏⵏ ⵎⵏⵏⴰⵡ ⵏ ⵉⵡⴰⵏⴽⵏ ⴷ ⵜⵎⵔⵙⴰⵍ ⴷ ⵜⵎⴰⴷⴷⴰⵙⵉⵏ ⵜⵉⵏⵎⵏⴰⴹⵉⵏ ⴷ ⵜⵉⴳⵔⴰⵖⵍⴰⵏⵉⵏ.

ⵉⴷⵔⴰ ⵖ ⵓⴳⵔⴰⵡ ⴰⴷ ⵎⵏⵏⴰⵡ ⵉⵎⵓⵥⴰⵢⵏ ⴷ ⵉⵎⵙⵜⴳⴳⴰⵔⵏ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ, ⴷ ⵓⵍⴰ ⵉⵎⵙⵜⴳⴳⴰⵔⵏ ⵏ ⵜⵎⵉⵣⴰⵔ ⵍⵍⵉ ⵢⴷⵔⴰⵏ ⴳ ⵓⵙⵎⵓⵜⵜⴳ ⵏ ⵓⵙⵎⵓⵏⵉ ⵏ ⵜⵎⵓⵛⴰ ⵅⴼ ⵉⵙⵏⵎⴰⵍⵍⴰ ⵏ ⵜⵣⴷⴳⵉ ⴳ ⵉⴳⵔ ⴰⵎⴰⵜⴰⵢ ⵙⴳ ⵍⵓⵕⴹⵓⵏ, ⵣⴰⵎⴱⵢⴰ, ⵛⵛⵉⵍⵉ, ⵚⴱⴰⵏⵢⴰ ⴷ ⴽⵓⵙⵟⴰⵚⵉⴽⴰ, ⴷ ⵉⵎⵙⵜⴳⴳⴰⵔⵏ ⵏ ⵜⵎⵓⵏⵜ ⵜⵓⵕⵓⴱⴱⵉⵜ, ⴷ ⵓⵍⴰ ⵙⴳ ⵍⴱⴰⵏⴽ ⵏ ⵉⴼⵔⵓⵇⵢⴰ ⵉ ⵜⴳⵎⵉ, ⴷ ⵎⵏⵏⴰⵡ ⵏ ⵉⵙⵎⴷⵢⴰⵡⵏ ⵉⴷⵉⴱⵍⵓⵎⴰⵙⵉⵢⵏ, ⴷ ⵉⵎⵙⵜⴳⴳⴰⵔⵏ ⵏ ⵜⵎⴰⵡⵙⴰⵙⵉⵏ ⴷ ⵜⵎⵔⵙⴰⵍ  ⴷ ⵜⵙⵏⵓⵔⴰⵢⵉⵏ ⵜⵉⴳⵍⴷⴰⵏⵉⵏ ⴷ ⵜⵎⵙⵎⵓⵏⵉⵏ ⵏ ⵓⵎⵓⵏ ⵓⵖⵔⵉⵎ.

ⴳ ⵜⵉⵏⴰⵡⵜ ⵏⵏⵙ ⵜⴰⵎⵣⵡⴰⵔⵓⵜ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵎⴰⵙ ⴷ ⴰⵙⵎⵓⵏ ⵏ ⵜⵉⵏⴰⵡⵜ ⴰⴷ ⵉⵙⵎⴷⵢⴰ ⵢⴰⵏ ⵓⵣⵎⵣⵣⵓ ⴰⵎⵇⵔⴰⵏ ⵏ ⵓⵙⵔⵙ ⵏ ⵓⵙⵎⵓⵜⵜⴳ ⵏ ⵜⵓⵙⵙⵏⴰ ⴷ ⵓⵙⵏⴼⵍ ⵏ ⵉⵔⵉⵎⵏ ⴳⵔ ⵜⵎⵉⵣⴰ, ⵅⴼ ⵓⵙⵇⵙⵉ ⵏ ⵜⵥⵍⴰⵢⵜ ⵜⴰⴳⴷⵓⴷⴰⵏⵜ ⴰⵎⵎ ⵓⵙⴰⵜⵉ ⵏ ⵓⵙⴷⵓⵙ ⵏ ⵜⵎⵢⴰⵎⴰⵏⵜ ⴳ ⵜⵎⵔⵙⴰⵍ ⴷ ⵢⴰⵏ ⵓⵙⴰⵜⵉ ⵏ ⵓⵙⵙⴽⵏ ⵏ ⵜⴳⵎⵉ ⵜⴰⵙⵓⵍⴰⵏⵜ. 

ⵉⵙⴼⵔⵓ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙ ⴷ ⵓⵔ ⵉⴳⵉ ⵓⵎⴰⴳⵔ ⴰⴷ ⵢⴰⵜ ⵜⵙⵎⵓⵏⵉ ⵜⴰⵜⵉⵇⵏⵉⵢⵜ, ⵎⴰⵛⴰ ⵉⴳⴰ ⵢⴰⵏ ⵓⵙⵜⴰⵢ ⴰⵎⴰⴷⴷⵓⴷ ⴷ ⵜⵎⵙⴰⵙⵜⵉⵜ ⵜⴰⴷⵖⵔⴰⵏⵜ ⵉⵔⴰⵏ ⴰⴷ ⵉⵙⵙⵏⵏ ⵉⵎⵢⴰⵙⵙⴰⵏⵏ ⵏ ⵉⵎⵓⵙⵙⵓⵜⵏ ⵏ ⵜⵣⴷⴳⵉ ⵜⴰⴳⴷⵓⴷⴰⵏⵜ, ⴷ ⴰⴷ ⵉⵜⵜⵓⵙⵜⴰⵢ ⵓⵣⵣⵉⴳⵔ ⴳⵔ ⵜⵎⵙⴰⵙⵜⵉⵏ ⵉⵜⵜⵓⵙⵏⵎⴰⵍⴰⵏ ⴷ ⵜⵢⴰⴼⵓⵜⵉⵏ ⵉⵜⵜⵓⵙⵏⵎⴰⵍⴰⵏ, ⴳ ⵢⴰⵜ ⵜⵏⵏⴰⵢⵜ ⵉⵅⴰⵜⵔⵏ ⵉⵔⴰⵏ ⴰⴷ ⵉⵙⴱⵓⵖⵍⵓ ⴷ ⴰⴷ ⵉⵙⴽⵔ ⵢⴰⵜ ⵜⴰⵏⵏⴰⵢⵜ ⵉⵖⵓⴷⴰⵏ ⵉⵡⵜⵜⵙⵏ ⴰⵙⴼⴰⵍⴽⵉ ⴷ ⵓⵙⵖⵓⴷⵉⴷ. 

ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙ ⴷ ⵜⵔⴰ ⵜⵙⵓⵜⵍⵜ ⴰⴷ ⵢⵓⵛⴽⴰⵏ ⴰⴷ ⵜⵙⵙⵏⴼⵍ ⵙⴳ ⵓⵏⴳⵎⵓ ⵏ ⵓⵙⵍⴳⵏ ⴰⵔ ⵓⵏⴳⵎⵓ ⵏ ⵓⵣⵣⵓⴳⵔ, ⵙ ⵓⵃⵟⵟⵓ ⵏ ⵜⵉⵔⵡⵉ ⵏ ⵉⴹⵕⵉⵚⵏ ⴷ ⵜⵙⵓⵍⴰⵏⵜ ⵏ ⵓⴹⴼⴰⵕ ⵏⵏⵙⵏ ⴳ ⵓⴳⵏⵙⵓ ⵏ ⵜⵎⵀⵍⴰ ⴷ ⵡⴰⵎⵓⵏ, ⵉⵙⴷⴷⵉⴷ ⵎⴰⵙ ⵜⵉⵥⵉⴹⵕⴰ ⵍⵍⵉ ⵢⴼⴽⴰⵏ ⵜⵢⴰⴼⵓⵜⵉⵏ ⵓⵔ ⴳⵉⵏⵜ ⴰⴽⴽⵡ ⵉⵙⵏⴼⵍⵏ.