ⵉⴷⵔⴰ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴳ ⵜⵙⵓⵜⵍⵜ ⵜⵉⵙⵙ 31 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵕⵉⴳⵜ  ⴷ ⵓⴷⵍⵉⵙ, ⵍⵍⵉ ⵔⴰⴷ ⵜⵙⵏⵓⴱⴳ ⵜⵎⴷⵉⵏⵜ ⵏ ⵕⵕⴱⴰⵟ ⴳ ⵓⵣⵎⵣ ⵙⴳ 30 ⵉⴱⵔⵉⵔ ⴰⵔ 10 ⵎⴰⵢⵢⵓ 2026, ⵙ ⵓⵖⴰⵡⴰⵙ ⴰⵅⴰⵜⴰⵔ ⵏ ⵉⵏⵎⵓⵇⵇⴰⵔⵏ ⴷ ⵜⵏⵉⵡⴰⵏⵉⵏ ⴷ ⵉⵎⴹⴰⴽⴰⵕⵏ.

ⵉⴷⵔⴰ ⵓⴳⵔⴰⵡ, ⵙ ⵓⵙⴳⴳⵯⴰⵙ ⵡⵉⵙⵙ ⴽⵕⴰⴹ, ⴷ ⵜⵎⵔⵙⴰⵍ ⵏ ⵜⵏⵓⴱⴹⴰ (ⴰⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⵏⴰⴹ, ⴰⵙⵇⵇⵉⵎ ⵏ ⵜⵎⵙⵎⵓⵏⵜ ⵏ ⵍⵎⵖⵔⵉⴱ ⴳ ⴱⵕⵕⴰ, ⵜⴰⵙⵏⵓⵔⴰⵢⵜ ⵜⴰⵎⴰⵜⴰⵢⵜ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵇⵇⵉⵎ ⵏ ⵓⵎⵣⵉⵣⵡⵔ, ⴷ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵙⵎⵙⴰⵙⴰ ⵏ ⵓⴼⵔⴰⴳ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ), ⵢⴰⵏ ⵓⴱⴰⵔⴰⵣ ⵉⵛⵛⴰⵔⵏ ⵉⵙⵏⵎⴰⵍⵏ ⵜⵉⵔⴰⵜ ⵜⴰⴳⵔⴰⵡⴰⵏⵜ ⵏ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵉⵏⵎⵓⵔⴰ ⵅⴼ ⵜⵎⵙⴰⵔⵉⵏ ⵏ ⵜⵏⴱⴰⴹⵜ.

ⵉⵙⵙⵓⵊⴷ ⵓⴳⵔⴰⵡ ⴰⵏⴰⵎⵓⵔ ⵖ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⴰⴷ ⵜⴰⴳⵔⴰⵡⴰⵏⵜ, ⵢⴰⵏ ⵓⵖⴰⵡⴰⵙ ⵉⵥⵍⵉⵏ ⵙ ⵓⴼⵔⴰⴽ ⵏ ⵉⵏⵎⵓⵔⴰ ⴷ ⵓⵕⵥⵥⵓⵎ ⵏ ⵓⵎⵙⴰⵡⴰⵍ ⵅⴼ ⵜⵎⵙⴰⵔⵉⵏ ⵏ ⵜⵣⴷⴳⵉ. ⴰⵔ ⵜⵎⵎⴰⵍ ⵜⴷⵔⴰⵡⵜ ⴰⴷ ⵜⴰⵡⵉⵜ ⵏ ⵓⴳⵔⴰⵡ ⴼ ⵓⵙⵓⴷⵙ ⵏ ⵉⵎⵓⵙⵙⵓⵜⵏ ⵏⵏⵙ ⵙⴳ ⵉⵏⵎⵓⵔⴰ, ⴰⵡⴷ ⴰⴼⵕⵕⵓ ⴳ ⵓⵙⵙⴷⵓⵙ ⵏ ⵜⵓⵙⵙⵏⴰ ⵏ ⵜⵣⴷⴳⵉ ⴳ ⵡⴰⵎⵓⵏ. ⵜⵙⴽⵔ ⴰⵡⴷ ⵢⴰⵏ ⵡⴰⵏⵙⴰ ⵉⴼⵓⵍⴽⵉⵏ ⵉ ⵉⵎⵥⵥⵢⴰⵏⵏ, ⵍⵍⵉⵖ ⵔⴰⴷ ⵉⵙⵏⵓⴱⴳ ⵓⴳⴳⵯⴰⵔ ⵏ 300 ⵏ ⵉⵎⵥⵥⵢⴰⵏⵏ ⴷ ⵉⵄⵔⵔⵉⵎⵏ (ⴳⵔ 5 ⴷ 18 ⵓⵙⴳⴳⵯⴰⵙ) ⵃⵎⴰ ⴰⴷ ⴷⵔⵓⵏ ⵖ ⵜⵙⴰⵡⵔⵉⵏ ⵏ ⵓⵙⴳⵎⵉ, ⴷ ⵉⵎⵓⵙⵙⵓⵜⵏ ⵏ ⵜⵥⵓⵕⵉ ⵉⵡⵜⵜⵙⵏ ⴰⴷ ⵙⵙⵍⵎⴷⵏ ⵉⵎⵉⴽ ⵙ ⵉⵎⵉⴽ ⵉⵎⵏⵣⴰⵢⵏ ⵏ ⵜⵣⴷⴳⵉ, ⵙ ⵜⴷⵔⴰⵡⵜ ⵏ ⵉⵏⴰⵥⵓⵕⵏ ⴷ ⵉⵎⵓⵥⴰⵢⵏ.

ⵔⴰⴷ ⵙⵎⵓⵏⵜ ⵜⵉⵏⴰⵡⵉⵏ ⴷ ⵜⵖⴰⵙⵉⵏ ⵏ ⵓⵎⵙⴰⵡⴰⵍ, ⵜⵓⴳⵜ ⵏ ⵉⵎⵙⴽⴰⵔⵏ ⵉⵎⵔⵙⴰⵍⵏ ⴷ ⵉⵎⴷⵡⴰⵍⵏ ⵉⵏⴰⵎⵓⵔⵏ ⴷ ⵉⵎⴰⴹⴰⵍⵏ, ⵎⴰ ⵔⴰⴷ ⵉⴼⴽ ⵢⴰⵏ ⵓⵎⵙⴰⵡⴰⵍ ⵉⴷⵔⴰⵏ ⵅⴼ ⵜⵎⵙⴰⵔⵉⵏ ⵜⵉⵅⴰⵜⴰⵔⵉⵏ ⵏ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵙ ⵓⵎⵙⴰⵙⴰ ⴷ ⵉⵏⵣⴳⵓⵎⵏ ⵏ ⵉⵏⵎⵓⵔⴰ. ⵔⴰⴷ ⵉⵙⵏⵎⴰⵍⴰ ⵓⴳⵔⴰⵡ ⴰⵡⴷ ⵢⴰⵜ ⵜⵉⵏⴰⵡⵜ ⵏ ⵓⵎⴹⴰⴽⴰⵕ ⴰⵎⴳⵔⴰⵡ ⵏⵏⴰ ⵖ ⴷⵔⴰⵏ ⵜⵓⴳⵜ ⵏ ⵉⵎⴰⵔⴰⵜⵏ ⴷ ⵉⵎⴰⵙⵙⴰⵏ, ⴷ ⵓⵍⴰ ⵜⵉⵖⵉⵎⴰ ⵏ ⵓⵙⵎⵏⵉⴷ ⵏ ⵜⵏⵇⵇⵉⵙⵉⵏ ⵎⵎ ⵉⵎⵏⵉⴷⵏ ⵉⵙⵎⴰⵜⵜⴰⴳⵏ, ⵏⵏⴰ ⵔⴰⴷ ⵢⴰⵡⵙ ⵖ ⵓⵙⵓⵜⵜⵓⵢ ⵏ ⵓⵎⵙⴰⵡⴰⵍ ⴰⴳⴷⵓⴷⴰⵏ ⴷ ⵓⴳⴷⵓⴷ.

ⴳ ⵓⵢⵏⵏⴰ ⵢⴰⴹⵏⵉⵏ, ⴷⴰ ⵢⴰⴽⴽⴰ ⵓⴱⴰⵔⴰⵣ ⵏ ⵓⴳⵔⴰⵡ ⴰⵣⵎⵣⵣⵓ ⵏ ⵓⵙⵓⵎⵏ ⵏ ⵜⵡⵓⵔⵉⵡⵉⵏ ⵏⵏⵙ ⴷ ⵜⵉⵍⴰⵍ ⵏⵏⵙ ⵙ ⵜⵓⴳⵜ ⵏ ⵜⵏⴰⴹⵉⵏ ⴷ ⵉⵎⴰⵏⴰⵔⵏ ⴷ ⵉⴷⵍⵉⵙⵏ ⵉⵍⵍⴰⵏ ⵙ ⵜⵓⵜⵍⴰⵢⵉⵏ ⵜⴰⵄⵕⴰⴱⵜ ⴷ ⵜⴰⵎⴰⵣⵉⵖⵜ ⴷ ⵜⴼⵕⴰⵏⵚⵉⵚⵜ, ⵎⴰ ⵢⴰⴷ ⵔⴰⴷ ⵢⴰⵊⵊ ⵉⵏⵔⵣⵉⴼⵏ ⴰⴷ ⵔⵎⵙⵏ ⵎⵛⵜⴰ ⵏ ⵜⵍⴰⵍⵉⵏ ⵏⵏⵙ ⴷ ⵉⵎⵓⵔⵙⵏ ⵏ ⵓⴳⵔⴰⵡ, ⵓⵍⴰ ⵜⵓⵎⴰⵢⵉⵏ ⵏ ⵓⵎⵢⴰⵡⴰⴹ ⴷ ⵉⵎⵉⴽⴰⵏⵉⵣⵎⵏ ⵏ ⵓⵙⵙⴼⵍⴷ, ⵉⵜⵜⵓⵙⴽⴰⵔⵏ ⴰⴼⴰⴷ ⴰⴷ ⵜⵍⴽⵎ ⵜⵎⵓⵛⴰ ⵙ ⵜⵖⴰⵔⴰⵙⵜ ⵉⵔⵅⴰⵏ ⵉⵜⵜⴰⵡⵙⵏ ⵖ ⵜⴰⵡⵉⵜ ⵏ ⵜⵎⵙⴰⵔⵉⵏ ⵏ ⵜⵣⴷⴳⵉ ⴷ ⵓⵙⴱⴷⴷⵉ ⵏ ⵓⵙⴳⵓⴼⵙⵓ.